Pääli trapunhalli. Kuva: Anna Danielson/Nationalmuseum

Hyvä tietää ennen sinun myseymmin käyntiä

Nationalmuseum on Stokholmin Blasieholmenilla ja on uuesti auki vierailijoile. Viien vuen remontin jälkhiin, 2013–2018, olet lämpimästi tervetuloinen, takashiin eli ensimäistä kertaa.

Vastakorjatussa Nationalmuseummissä on sekä taije ette ihmiset keskustassa. Näyttelyalat on suuremat ja lissää taijetta näytethään. Myseymmi saattaa kans ottaa vasthaan paljon enemän vierailijoita kun aiemin. Päivänvalo virtaa sisäle ja ilmasto on parempi, sekä taitheele ja kaikile jokka oleskelevat myseymmissä.

Löytää myseymhiin

Nationalmuseum on Stokholm cityn kestustassa, Blasieholmenilla, vastapäätä Kuninkhaan linnaa.

Sinne on helppo tulla tynnelbaanala, byssilä, färilä eli pyörälä. Se on kans hauska kävelä tänne, riippumatta missä paikkaa kaupunkissa sie olet.

Vierailuosote: Södra Blasieholmshamnen, Stokholmi

Aukioloaijat

Myseymmin tavaliset aukioloaijat on tiistai, keskiviikko, lauantai–pyhä kello 11:00–17:00, tuorestai 11:00–21:00, perjantai 11:00–19:00, maanantai kiinni. Pyhäpäivinä saattaa olla vaihtelevia aukioloaikoja.

Pääsymaksut

Jos ei muuta mainita on vapa pääsy Nationalmuseumhiin. Poikkeus on suuremat sattunhaiset näyttelyt ja evenemangit kuten näyttelyt, kursit ynnä muuta.

Pääsymaksu sattunhaishiin näyttelhyin

  • Tavalinen pääsy: 150 kr
  • Alenettu pääsy (seniuurit ja opiskelijat): 120 kr
  • Vapa pääsy alle 20 vuotta
  • Vapa pääsy Nationalmusei Vännerin jäsenele
  • Vapa pääsy Moderna Museets Vännerin jäsenele
  • Vapa pääsy muile: ICOM, ICOMOS, SMI, Riksförbundet Sveriges museer, keskusmyseitten henkilökunnale, sjurnalistile, apulaisele ja henkilökohtaisile asistentile, auktorisoitule ophaile, reisunjohtajile ja/kans kuskale sekä opettajat luokkien kans. Toistus joka oikeuttaa vapa pääshyyn häätyy näyttää.

Ostaa ja varata etukätheen = mennä jonon ohi

Osta mielelhään sinun biljetin etukätheen. Sulla jolla on vapa pääsy (katto ylhäälä) saatat samala tavala varata etukätheen sinun biljetin. Biljetit jokka on ostettu eli varattu etukätheen antavat pääsyn ohi jonon. Seuraa sjylttausta myseymmin ulkopuolela ja näytä biljetti, ja vapakortin/toistuksen paikala olevale vahile eli väärtile.

Maholisia jäljelä olevia biljettiä myythään paikan päälä myseymissä, ainuasthaan kortti ja swishi maksola.

Osta eli varraa biljetti (vain ruottiks)

Käytettävyys

Pääsy

Myseymmin pääportti on talon etupuolela, kaijia vasten.

Hissi katutasolta pääportile on oikeala puolela portintrappua. Hississä on tillaa kahele rullatoolile, permobiilile ja lastenvaunuile.

Vammaisten parkkeerinkipaikka on oikeala puolela pääporttia, hissin laijala. Lähiympäristössä on huonosti parkkeerinkipaikkoja.

Rullatoolia ja ryllaatturia on lainattavana pääporttikerroksessa.

Hissiä

Hissiä missä on tillaa rullatoolile, permobiilile ja lastenvaunuile on joka kerroksessa. Hississä on auttomaattiset ovet.

Ovet

Kaikki myseymmin ovet on joko avvastuna eli niissä on auttomaattiset ovenaukasijat.

Tualetit

On useampia tualettia allikerroksessa.

Vammaisten tualettia on jokhaisessa kerroksessa. Hoitopöytiä on vammaisten tualetissa.

Väskyjä ja säilytysmaholisuuksia

  • On sallittu ottaa mukhaan pienempiä väskyjä (korkeinthaan 42x30x10 sm) näyttelhyin. Sallittujen kokojen laukkuja saapi ottaa näyttelhyin, mutta häätyy kantaa käessä.
  • Suurempia väskyjä ja laukkuja, kävelysavvoja, piikkikenkiä (broddar) ja satheenvarjoja ei saa ottaa matkhaan, vaan häätyy lukittaa säilytyskaaphiin.
  • Jakkojen, väskyjen ja laukkujen säilytyskaappia on allikerroksessa.
  • Kaapitten mitta: 40x38x36,5 sm, pienempi määrä kaappia missä on mitat: 40x38x47 sm.
  • Jos sulla on vaikeuksia auvvasta kaappia vierailun jälkheen? Kontaktaa myseymmin henkilökuntaa paikala.

Jäljele unhoutettuja kampheita

Unhoutettuja vaatheita, kirjoja, ja sellaista joka ei ole arvotavaaraa säästethään erikoisessa loovassa. Sie saat itte tulla takashiin myseymhiin ja hakea jos se mitä olet unhouttanu on jäljelä sielä. Kysy joiltaki vahilta eli paikala olevilta väärtiltä niin net näyttävät sulle loovan.

Jos olet menettäny arvotavaraa, kontaktaa myseymmiä e-postin kautta info@nationalmuseum.se

Ole varovainen!

Olemalla varovaisia met autama ette tulevat sukupolvet kans saattavat kokea myseymin taijeaartheita.

Se on helppo sattua pukkaamhaan näyttelyitten taijeteoksia, olletikki jos on ahasta. Siksi ei ole sallittu ottaa matkhaan salhiin laukkuja, suurempia väskyjä ja satheenvarjoja ynnä muuta. Ei ole sallittu kans ottaa matkhaan ruokaa eli juomaa koska ei haluta sattua saamhaan läiskymistä ja jätheitä.

Miksi ei saa koskea taijetta?

Vaikka ei näy eikä tunnu meilä on aina vähän likkaa sormissa. Suola ja rasva mikä on luonolisesti käsissä jättää merkkiä, ja loukkaa siksi vakavasti taijeteoksia, jos met kosketama niitä. Siksi ei ole sallittu ette, ees varovaisesti, koskea myseymmin taijetta. Tämä koskee kans muotoilu- ja taijekäsityön kampheita ja ikoonia.

Herkät laattiat

Myseymmin parkettilaattiat ei kestä piikkikenkiä (broddar) ja kävelysavvoja. Siksi et saa luppaa ottaa sellaisia sisäle. Lukita mielelhään piikkikengät ja kävelysavvat allikerroksen säilytyskaaphiin.

Hithaasti

Salissa on ahasta ja kaikila jolla on lasten halu laukkoa tarttevat hiastaa vauhtia. Lapset saattavat tarvittea saa käen mistä piättää.

Syöä ja jua

Ravintola Nationalmuseum tarjoa yllättäviä modernin Ruottin makuja. Sosiaalisista pitkälounaksista missä on uuistettuja klassikkeriä tarjoiltu ruokasalissa, yllättävhiin pikkuruokhiin, verestä leivottua ja laajakattava Glasbar ja Cafén juomaohjelma. Tietysti on kans ruokia, jokka on lasten rakastetut. Täälä on jotakin syömistä ja juomista koko pitkän päivän.