​Kokoelmista

Nationalmuseumin kokoelmissa on 1500-luvulta 1900-luvun taitheesheen maalauksia, patshaita, tekninkiä ja grafiikkia sekä taijekäsityötä ja muotoilua 1500-luvulta tähhään päivhään. Taijekäsityön- ja muotoilukokoelma sisältää Gustavsbergkokoelman, missä on suunile 40 000 esinettä Gustavsbergin porsliinitehtaasta. Nationalmuseum hallittee kans Statens porträttsamling, missä on muotokuvia 1400-luvulta lähtien. Siihen kuuluu huomattava kokoelma muotokuvauksia. Gripsholmin linna Mariefredissä on Statens porträttsamlinkin kotipaikka.

Ruottia ympäri Nationalmuseum

Paitti näitten lisäks myseymmi on vastuussa taitheen ja taijekäsityön kokoelmista useamissa linnoissa, herrastaloissa ja myseymmissä ympäri Ruottia, muun muassa kuninkhaaliset linnat Gripsholm, Drottningholm, Strömsholm, Rosersberg ja Ulriksdal.

Läckö linna

Läckö linnassa Västergötlandissa on 1600-luvun Ruottin suurvallanaijan luksusesinheitten kokoelmia . Nationalmuseum on niitten hoitaja, joka kans tuottaa kesänäyttelyitä, jokka joka kesä näytethään linnassa.

Nynäsin linna

Nynäsin linna, Nyköpingin kunnassa, on lähespä täysin säilytetty herrasväen koti, 1600-luvulta orginaaliesinheitä aina 1900-luvun alkhuun. Nationalmuseum omistaa ja hoitaa linnan inventaarit.

Nationalmuseum Jamtli

Nationalmuseum Jamtli, joka aukasthiin 17 kesäkuu 2018, on yhteistyö Stokholmin Nationalmuseummin ja alueelisen Jamtli myseymmin kans Östersundissä. Se on myseymmi myseymmissä ja areena Östersundin taije- ja muotoilukokemuksile missä Jamtlin kunnioitettu pedagogiikka kombineerathaan Nationalmuseummin ainutlaatuisten kokoelmitten ja tioitten kans. Näyttelyitä tuottaa Nationalmuseummi ja näyttää avvainteoksia myseymmin taije- ja muotoilukokoelmista.